Enter your Email Address to subscribe to our newsletters
बैतूलनगरम्, १८ जूनमासः (हि.स.)। केन्द्रीयजनजातीयकार्य-राज्यमन्त्री दुर्गादास: उईके उक्तवान् यत् ओडिशाराज्यस्य लघुजनजातीयग्रामात् आरभ्य देशस्य सर्वोच्चसंवैधानिकपदं यावत् प्राप्तवती राष्ट्रपति: द्रौपदीमुर्मु: भारतीयलोकतन्त्रस्य शक्तेः, संविधानस्य महानतायाः तथा सामाजिकसमरसतायाः जीवितोदाहरणत्वेन अस्ति। तस्याः जीवनं संघर्षस्य, समर्पणस्य, सेवायाः तथा कर्तव्यनिष्ठायाः अनुपमं निदर्शनम् अस्ति।
केन्द्रीयमन्त्री उईके गुरुवासरे मध्यप्रदेशस्य बैतूलनगरे राष्ट्रपतेः उपस्थितौ प्रजापिता-ब्रह्माकुमारी-ईश्वरीय-विश्वविद्यालयेन आयोजिते ‘आध्यात्मिकजागृत्या जनजातीयसमाजस्य सशक्तीकरणम्’ इति महासम्मेलने सम्बोधितवान्।
तेन उक्तं यत् राष्ट्रपति: मुर्मु: स्वकर्मठतया, धैर्येण तथा वञ्चितवर्गाणां उत्थानाय अटूटप्रतिबद्धतया केवलं सर्वोच्च-संवैधानिकपदं शोभितवती न, अपितु देशस्य प्रत्येकं बाला, जनजातीय-समाजस्य सामान्यनागरिकस्य च कृते प्रेरणास्रोतत्वेन अभवत्। तस्याः नेतृत्वं सामाजिकन्यायस्य, संवैधानिकमूल्यानां रक्षणस्य तथा राष्ट्रनिर्माणस्य दिशि सर्वान् प्रेरयति।
अस्मिन् अवसरे मध्यप्रदेशस्य राज्यपालः मंगुभाईपटेल: अपि उक्तवान् यत् आध्यात्मिकचेतना तथा धार्मिकमूल्यानां माध्यमेन समाजः उन्नतं, संस्कारितं तथा सम्मानपूर्णं जीवनं प्राप्तुं शक्नोति। तेन प्रजापिता-ब्रह्माकुमारी-संस्थायाः समाजे सकारात्मकपरिवर्तनं साधयितुं कार्यं प्रशंसितम्।
पूर्वं कार्यक्रमस्थले अनहदसंगीत-महाविद्यालयस्य सप्तसदस्यीयकलाकारैः मनोहरस्वागत-नृत्यं प्रस्तुतम्। ततः राष्ट्रपतिना कलशध्वजौ ब्रह्माकुमारी-भगिनीभ्यः समर्प्य महासम्मेलनस्य शुभारम्भः कृतः। तदनन्तरं राजयोगिनी-मञ्जू-भगिनी इत्यादिभिः अतिथीनां स्मृतिचिह्नेन सम्मानं कृतम्।
ततः राष्ट्रपतिमहोदयया प्रदर्शिन्याः अवलोकनं कृत्वा जनजातीयसमाजस्य प्राकृतिककृषिउत्पादानां प्रशंसा कृता। अस्मिन् अवसरे अन्येऽपि अतिथयः उपस्थिताः आसन्।
Hindusthan Samachar / Divya Ranjan