मुम्बईनगरम्, ०५ जूनमासः (हि.स.)। बॉलिवुड-अभिनेतु: ऋतिक-रोशनस्य नवीनेन सामाजिक-माध्यम-प्रकाशनेन तस्य प्रशंसकानां विशेषं ध्यानम् आकृष्टम्। पेरिस-नगरात् सहभागकृतेन स्वचित्रेण (सेल्फी) सह अभिनेत्री स्वस्य अभिनय-जीवनं प्रिय-पात्राणि च विषयीकृत्य अन्तःकरणस्य भावाः व्यक्तीकृताः। अस्मिन् चित्रे तस्य पृष्ठभागे एफिल-टावरः दृश्यते, तस्य भावपूर्णः सन्देशः च प्रशंसकेषु चर्चाविषय: जातः।

स्वस्य प्रकाशने सः अवदत् यत् अद्यतनकाले तस्मै पृष्टम् आसीत्—“भवान् कीदृशं पात्रम् अभिनेतुम् इच्छति?” अस्य प्रश्नस्य उत्तरं चिन्तयन् तस्मै ‘लक् बाय् चान्स्’ इति चलचित्रे अभिनीतं ‘जफ्फर’ नाम पात्रं स्मृतम्। सः लिखितवान्—“ममापि आश्चर्यम् अभवत् यत् अहं कीदृशं पात्रम् इच्छामि। ‘लक् बाय् चान्स्’ इत्यस्य जफ्फरः स्मर्यते वा? अहं तादृशं पात्रं शीघ्रमेव कर्तुम् इच्छामि। किन्तु निर्देशकाः मां केवलं सज्जन-पात्रेष्वेव द्रष्टुम् इच्छन्ति। एतत् दु:खजनकम् अस्ति।”

अस्य वक्तव्यस्य माध्यमेन अभिनेता स्वस्य अभिनयस्य नूतन-सम्भावनाः सूचितवान्। प्रेमप्रधान-साहसप्रधान-प्रेरणादायि-पात्रेषु सफलतां प्राप्तवान् अभिनेता अधुना अधिक-जटिलानि बहुआयामिकानि च पात्राणि निर्वोढुम् इच्छति। अस्य प्रकाशनानन्तरं सामाजिक-माध्यमेषु प्रशंसकाः अपि प्रतिक्रियां दत्त्वा उक्तवन्तः यत् ते तम् पारम्परिक-प्रतिमायाः परे स्थितेषु समस्यापूर्णेषु पात्रेषु द्रष्टुम् उत्सुकाः सन्ति।

Hindusthan Samachar / Divya Ranjan