जयपुरम्, १२ जुलाईमासः (हि.स.)। गोमातरं 'राष्ट्रमाता' इति घोषितुं तथा च सम्पूर्णे देशे गोवधे पूर्णप्रतिबन्धं विधातुं च आग्रहं कृत्वा अग्रिमे २७ जुलाईमासे देशव्यापी 'गौसम्मान-आह्वान-अभियानम्' आयोजयिष्यते। अस्य अभियानस्य अन्तर्गतं देशस्य सर्वेषु जनपदमुख्यालयेषु गोभक्ताः जनपदाधिकारिणः माध्यमेन राष्ट्रपतये, प्रधानमन्त्रिणे, राज्यपालाय तथा मुख्यमन्त्रिणे हस्ताक्षरयुक्तं ज्ञापनं समर्पयिष्यन्ति। राजधान्यां जयपुरेऽपि सहस्रशः गोभक्ताः समागत्य गोमातरं राष्ट्रमातरूपेण स्वीकर्तुं समर्थनार्थं संकल्पं गृह्णीयुः।

अभियानस्य द्वितीयचरणस्य सिद्धतासम्बन्धेन रविवासरे वैशाली-नगरस्थिते भारतीय-गौ-क्रान्ति-मञ्चस्य प्रदेशकार्यालये सभा आयोजिता। तत्र २७ जुलाईमासस्य कार्यक्रमस्य, जनसम्पर्क-अभियानस्य तथा हस्ताक्षर-अभियानस्य रूपरेखा निर्धारिता। अभियानं व्यापकजनान्दोलनरूपेण विकसितुं सन्तः, धार्मिक-सामाजिक-संस्थाः, गौशाला-सञ्चालकाः तथा युवानः संयोजयितुं निर्णयः कृतः। सभायामुपस्थितैः गोभक्तैः यावत् याचना: न पूर्यन्ते तावत् अभियानं निरन्तरं प्रवर्तयितुं संकल्पः स्वीकृतः।

सभां सम्बोधयन् गौऋषिः प्रकाशदास-महाराजः अवदत् यत् गोमाता केवलम् आस्थायाः विषयः नास्ति, अपितु भारतीयकृषेः, पर्यावरणस्य, प्राकृतिककृषेः तथा ग्रामीण-अर्थव्यवस्थायाः दृढाधार-शिला अस्ति। तेन केन्द्रसर्वकारात् गोमातरं राष्ट्रमातरूपेण, राजस्थान-सर्वकाराच्च राज्यमातरूपेण स्वीकर्तुं तथा सम्पूर्णदेशे गोवधे पूर्णप्रतिबन्धं प्रवर्तयितुं आग्रहः कृतः।

भारतीय-गौ-क्रान्ति-मञ्चस्य राष्ट्रीयाध्यक्षः ताराचन्द-कोठारी अवदत् यत् २७ जुलाईमासे जयपुरस्य मानसरोवरस्थिते वीटी-रोड-क्रीडाङ्गणे सहस्रशः गोभक्तानां महासङ्गमः भविष्यति। तस्य मते अस्य कार्यक्रमस्य उद्देश्यं नीतिनिर्मातॄन् गोसंरक्षणस्य पक्षे दृढनिर्णयान् ग्रहीतुं प्रेरयितुम् अस्ति। अस्मिन्नवसरे गौमहायज्ञस्य आयोजनमपि भविष्यति, यस्मिन् सामूहिक-आहुतयः प्रदास्यन्ते।

तेन उक्तं यत् कार्यक्रमे देशीय-गोवंशस्य वैज्ञानिकोपयोगिता, प्राकृतिककृषेः तथा ग्रामीणजीवने तस्य योगदानस्य विषये विशेषप्रदर्शिनी आयोजयिष्यते। विविध-गौशालानां प्रतिनिधयः गौसंरक्षण-संवर्धनयोः क्षेत्रे क्रियमाणानां नवाचाराणां परिचयं दास्यन्ति। श्रद्धालुभ्यः गोदुग्धं, तक्रम्, दधि तथा नवनीतं प्रसादरूपेण वितरिष्यते।

अस्यां सभायां गौऋषिः प्रकाशदासमहाराजः, भारतीय-गौ-क्रान्ति-मञ्चस्य राष्ट्रीयाध्यक्षः ताराचन्द-कोठारी, महाराजः पवनदासः, गोसेवकः सुगञ्जीशर्मा, आशीषमीणा, विनोदयादवः, सांगानेर-तहसील-प्रभारी भानुगौतमः, अनीताशर्मा, सुजाताशर्मा इत्यादयः अनेके गोसेवकाः उपस्थिताः आसन्।

एतस्मिन्नन्तरे अभियानस्य अन्तर्गतं जयपुरस्य आराध्य-ठाकुर-श्रीगोविन्ददेवजी-मन्दिर-परिसरे सञ्चाल्यमाने हस्ताक्षर-अभियाने श्रद्धालूनां व्यापकं समर्थनं प्राप्तम्। बहुसंख्यकाः श्रद्धालवः ज्ञापने हस्ताक्षरं कृत्वा अभियाने सहभागीभवितुं संकल्पम् अभिव्यक्तवन्तः। मञ्चस्य पदाधिकारिणः सामान्यजनान् २७ जुलाईमासे आयोज्यमाने देशव्यापि-अभियाने अधिकाधिकसङ्ख्यया सहभागित्वाय आह्वानम् अकुर्वन्।

Hindusthan Samachar / Divya Ranjan