जयपुरम्, १५ जुलाईमासः (हि.स.)। बैङ्क-ऑफ-बडौदा-इत्यस्य संयोजने कार्यरतया राज्यस्तरीय-बैङ्कर्स-समित्या राजस्थानेन बुधवासरे भारत-सर्वकारस्य आपातकालीन-ऋण-रेखा-प्रत्याभूति-योजना इत्यस्य विषये राज्यस्तरीय-जागरूकता-कार्यक्रमः आयोजितः। कार्यक्रमस्य मुख्यातिथिः मुख्यसचिवः वी.श्रीनिवासः आसीत्।

कार्यक्रमस्य शुभारम्भः मुख्यसचिवेन वी. श्रीनिवासेन, एसएलबीसी-राजस्थानस्य संयोजिकया तथा बैङ्क-ऑफ-बडौदा-इत्यस्य महाप्रबन्धिकया परिमिता-मिश्रया, राजस्थान-इन्स्टिट्यूट्-ऑफ-ट्रान्स्फॉर्मेशन-एण्ड-इनोवेशन इत्यस्य मुख्यकार्यकारी-अधिकारी सत्येन्द्र-कुमारेण, भारतीय-रिजर्व-धनागारस्य उपमहाप्रबन्धकेन राव-क्षितिजराज-सिंहेन, एमएसएमई-डीएफओ-इत्यस्य निदेशकेन प्रदीप-ओझा इत्यनया, लघु-उद्योग-भारती-इत्यस्य अध्यक्षेन महेन्द्र-मिश्रेण तथा एनसीजीटीसी-इत्यस्य सहायक-महाप्रबन्धिकया मेधा-गुरवेण दीप-प्रज्वलनेन अभवत्।

मुख्यसचिवः वी. श्रीनिवासः अवदत् यत् ईसीएलजीएस ५.० भारत-सर्वकारस्य महत्त्वपूर्ण: प्रयत्न: अस्ति, या वैश्विक-भूराजनैतिक-समस्यानां मध्ये अर्थव्यवस्थां सुदृढां करिष्यति। तेन उक्तं यत् पश्चिम-एशियायां विद्यमानस्य तनावस्य अपि भारतीय-सर्वकारस्य तथा भारतीय-रिजर्व-धनागारस्य सकारात्मक-नीतीनां कारणेन भारतीय-अर्थव्यवस्था सुदृढा एव वर्तते। एषा योजना विशेषतः एमएसएमई-क्षेत्रस्य कृते अत्यन्तम् उपयुक्ता अस्ति।

तेन उक्तं यत् ईसीएलजीएस ५.० इत्यस्य उद्देश्यं वैश्विक-व्यवधानैः, विशेषतः पश्चिम-एशिया-सङ्कटेन उत्पन्नाभिः तरलता-सम्बद्ध-समस्याभिः प्रभावितानाम् उद्यमानां समये वित्तीय-सहायतां प्रदातुम् अस्ति। अनेन उद्योगानां सञ्चालनं सुचारु भविष्यति, रोजगाराः सुरक्षिताः भविष्यन्ति तथा च आपूर्ति-श्रृङ्खला सुदृढा भविष्यति। तेन धनागारेभ्यः योजनायाः प्रभावी-क्रियान्वयनाय तथा उद्यमिभ्यः अस्याः अधिकतम-लाभग्रहणाय आह्वानं कृतम्।

एसएलबीसी-राजस्थानस्य संयोजिका तथा बैङ्क्-ऑफ्-बडौदा-इत्यस्य महाप्रबन्धिका परिमिता-मिश्रा अवदत् यत् ईसीएलजीएस ५.० केवलं वित्तीय-सहायता-योजना न, अपितु आर्थिक-पुनरुत्थानस्य मिशनम् अस्ति। तया उक्तं यत् धनागाराणां दायित्वं वर्तते यत् योजनायाः लाभः प्रत्येकं पात्रम् उद्यमिनं प्रति प्राप्यताम्।

आरआईटीआई-इत्यस्य मुख्यकार्यकारी-अधिकारी सत्येन्द्र-कुमारः योजनायाः सफल-क्रियान्वयनाय सर्वेषां संस्थानानां धनागाराणां च समन्वित-प्रयत्नानां महत्त्वम् अवदत्। कार्यक्रमे एमएसएमई-उद्यमिनां सफलताकथाः अपि प्रस्तुताः तथा च पात्र-लाभार्थिभ्यः योजनान्तर्गतं वित्तीय-सहायतायाः धनादेशाः वितरिताः।

अस्मिन् अवसरे एनसीजीटीसी तथा पीएसबी-एलायन्स-इत्येतयोः दलाभ्यां योजनायाः विस्तृता प्रस्तुति: कृता तथा प्रतिभागिनां जिज्ञासानां समाधानम् अपि कृतम्। भारत-सर्वकारस्य वित्तीय-सेवा-विभागस्य उपसचिवा गरिमा-कपूर: अन्तर्जाल-माध्यमेन प्रतिभागिनः सम्बोधितवती।

भारतीय-रिजर्व-धनागारस्य उपमहाप्रबन्धकः राव-क्षितिजराज-सिंहः धन्यवाद-ज्ञापनम् अकरोत्। कार्यक्रमे सार्वजनिक-निजी-क्षेत्रयोः धनागाराणां, विविध-ऋणदाता-संस्थानानां, उद्यमिनां, लाभार्थिनां च सह एसएलबीसी-राजस्थानस्य प्रमुखः उपमहाप्रबन्धकः राजकुमार-मीणा अपि उपस्थितः आसीत्।

Hindusthan Samachar / Divya Ranjan