नवदेहली, २० जुलाईमासः (हि.स.)। सामाजिक-माध्यम-अभियानस्य कॉकरोच-जनता-पक्षस्य प्रतिनिधि-मण्डलेन सोमवासरे केन्द्रीय-स्वास्थ्य-परिवार-कल्याण-मन्त्री जेपी-नड्डा-महोदयेन सह साक्षात्कारान्तरम् उक्तं यत् यावत् तेषां याचना: न पूर्यन्ते तावत् तेषां शान्तिपूर्णं प्रदर्शनं निरन्तरं प्रवर्तिष्यते। अपरतः मन्त्री नड्डा प्रदर्शनकारिभ्यः विरोधप्रदर्शनं समापयितुम् अनुरोधं कृतवान्।

सीजेपी-प्रतिनिधि-मण्डलेन सह स्वसाक्षात्कारस्य विषये सूचनां दत्त्वा नड्डा अवदत् यत् सः सर्वान् प्रदर्शनकारिणः विरोधप्रदर्शनं समापयितुं सामान्य-स्थितेः पुनःस्थापने प्रशासनस्य साहाय्यं कर्तुं च अनुरोधितवान्।

नड्डा सामाजिक-माध्यमे लिखितवान्— “प्रदर्शनकारिभिः अद्य प्रातःकाले प्रथमवारं सर्वकारेण सह वार्तालापस्य प्रस्तावः प्रस्तुतः। प्रातः ११:५० वादनतः वार्तालापः प्रवृत्तः। सभा सौहार्दपूर्ण-वातावरणे सम्पन्ना। प्रतिनिधि-मण्डलेन सह विस्तृतं प्रारम्भिक-सम्भाषणम् अभवत् तथा सायं चतुर्वादनस्य समीपे ते मह्यं लिखित-ज्ञापनम् अर्पितवन्तः। मया सर्वे प्रदर्शनकारिणः विरोधप्रदर्शनं समाप्तुं सामान्य-स्थितिं पुनःस्थापयितुं प्रशासनस्य साहाय्यं कर्तुं च अनुरोधिताः।”

नड्डा-महोदयेन सह मिलिते प्रतिनिधि-मण्डले सीजेपी-प्रवक्तारौ सौरव-दासः तथा आशुतोष-राङ्का समाविष्टौ आस्ताम्। ताभ्यां त्रिभिः प्रमुख-याचनाभिः युक्तं ज्ञापनं समर्पितम्। साक्षात्कारान्तरं सौरव-दासः अवदत् यत् केन्द्रीय-मन्त्री नड्डा केवलम् एतदेव आश्वासनं दत्तवान् यत् उचित-मञ्चे तेषां विषयः प्रस्तूयते। सः अवदत्— “याचना: पूरिताः न भवन्ति चेत् प्रदर्शनकारिणः न विरमिष्यन्ति। मन्त्रिणा आश्वासनं दत्तं यत् जन्तर-मन्तरे तदुपकण्ठ-प्रदेशेषु च अग्रे कापि कार्यवाही न भविष्यति।” तथापि आरक्षकैः निरोधनस्य कापि सूचना अद्यापि न प्राप्ता।

दासः पुनरवदत्— “वयं जेपी-नड्डा-महोदयेन सह द्विवारं मिलितवन्तः। सभायां वयं स्व-तिस्रः प्रमुख-याचना: प्रस्तुतवन्तः। प्रथमा— सोनम्-वाङ्चुकं शीघ्रं विमोच्यताम्। द्वितीया— धर्मेन्द्र-प्रधानः मन्त्रिमण्डलात् पदच्युतं क्रियताम् अथवा स: स्वयमेव त्यागपत्रं दद्यात्। तावत् विरोध-प्रदर्शनं प्रवर्तिष्यते। तृतीया— नीट-परीक्षायाः सिद्धतिं कुर्वतां येषां छात्राणां विंशत्यधिकानां मृत्युः अभवत्, तेषां परिवारेभ्यः प्रत्येकं एक-कोटि-रूप्यकाणां क्षतिपूर्तिः प्रदीयताम्।”

उल्लेखनीयं यत् संसदः वर्षाकालीन-सत्रस्य प्रथम-दिवसे सीजेपी-आह्वानेन देहल्याः जन्तर-मन्तरे तथा संसदः परिसरस्य समीपवर्तिषु प्रदेशेषु बहुसंख्यकाः युवानः समागताः। जनसमूहः संसद्-भवनस्य समीपम् अपि प्राप्तः। जनसमूहस्य विकीरणार्थम् आरक्षकैः लघु-बलस्य प्रयोगः कर्तव्यः अभवत्। अस्मिन् प्रसङ्गे अनेके छात्राः आहताः अभवन्, केचन आरक्षकाः सुरक्षाकर्मिणश्च आहताः इति समाचाराः प्राप्ताः।

Hindusthan Samachar / Divya Ranjan