Enter your Email Address to subscribe to our newsletters
हरिद्वारम्, 13 अगस्तमासः (हि.स.)।अशीतितमस्य स्वातन्त्र्यदिवसस्य उपलक्ष्ये बीएचईएल-हरिद्वारे छात्राणां कृते देशभक्तिपूर्णः सांस्कृतिकः कार्यक्रमः आयोजितः। कार्यक्रमे विभिन्नविद्यालयानां बालकलाकारैः गीतैः, नृत्यैः नाटिकाभिश्च देशप्रेम्णः राष्ट्रस्य प्रति उत्तरदायित्वस्य च सन्देशः प्रदत्तः।
कार्यक्रमस्य शुभारम्भः मुख्यातिथिना बीएचईएल-हरिद्वार-लेडीज-क्लबस्य संरक्षिका श्रीमती नन्दनकुमार्या तथा विशिष्टातिथिना कार्यपालकनिदेशकेन रञ्जनकुमारेण दीपप्रज्वलनेन कृतः।
अस्मिन् अवसरे नन्दनकुमार्या उक्तं यत् सांस्कृतिकगतिविधयः बालकानां व्यक्तित्वविकासे महत्त्वपूर्णां भूमिकां निर्वहन्ति। एताभिः बालकेषु देशस्य समाजस्य च प्रति उत्तरदायित्वस्य भावना अपि विकसिताः भवति। सा उक्तवती यत् राष्ट्रप्रेम केवलं शब्देषु सीमितं न भवेत्, अपितु अस्माकं व्यवहारेषु कार्येषु च अपि तस्य प्रकटीकरणं भवेत्।
कार्यपालकनिदेशकः रञ्जनकुमारः स्वातन्त्र्यदिवसस्य शुभकामनाः प्रदाय बालकलाकाराणां प्रस्तुतयः प्रशंसितवान्। सः उक्तवान् यत् बालकलाकारैः स्वकलामाध्यमेन देशस्य प्रति प्रेम उत्साहश्च प्रभावशालिरूपेण प्रस्तुतौ।
कार्यक्रमे बीएचईएल-उपनगरस्य बालमन्दिरस्य, विद्यामन्दिरस्य, डीपीएस-विद्यालयस्य, केन्द्रीयविद्यालयस्य, सरस्वतीशिशुमन्दिरस्य, गुरुनानक-एकेडमी-विद्यालयस्य, शिवडेल-विद्यालयस्य तथा सरस्वतीविद्यामन्दिरस्य बालकाः भागं गृहीतवन्तः। विद्यार्थिभिः देशभक्तिपूर्णगीतैः, नृत्यैः तथा नाटिकाभिः कार्यक्रमे विशेषं सौन्दर्यं समुत्पादितम्।
कार्यक्रमस्य अवधौ बालकेषु विशेषः उत्साहः दृष्टः। प्रस्तुतिभिः स्वातन्त्र्यसङ्ग्रामस्य, राष्ट्रप्रेम्णः तथा देशस्य प्रति नागरिककर्तव्यानां च सन्देशः प्रदत्तः।
अस्मिन् अवसरे बीएचईएल-संस्थायाः महाप्रबन्धकाः, सीआईएसएफ-अधिकारीणः, लेडीज-क्लबस्य पदाधिकारीणः, विभिन्नविद्यालयानां प्रधानाचार्याः, शिक्षकाः, अभिभावकाः तथा माध्यमप्रतिनिधयः उपस्थिताः आसन्। कार्यक्रमस्य अन्ते अपरमहाप्रबन्धकेन निखिलवर्मणा सर्वेषां अतिथीनां, प्रतिभागिनां उपस्थितजनानां च प्रति कृतज्ञता प्रकटिता।
---------------
Hindusthan Samachar / Dheeraj Maithani