कोलकाता, १३ अगस्तमासः (हि.स.)। डॉ. श्यामाप्रसादमुखर्जीणः १२५तमजयन्त्य-वसरे पश्चिमबङ्गालसर्वकारेण तस्य जीवनं योगदानं च विद्यालयात् विश्वविद्यालयस्तर-पर्यन्तं पाठ्यक्रमे समावेशयितुं महत्त्वपूर्णः निर्णयः कृतः। मुख्यमन्त्री शुभेन्दुअधिकारी गुरुवासरे नवान्ने आयोजितायाः विशेषसमितेः प्रथमसभायाः अनन्तरम् एतस्य घोषणां कृतवान्। सः अवदत् यत् अग्रिमशैक्षणिक-सत्रात् विद्यालयशिक्षा-विभागस्य उपक्रमेण पाठ्यक्रमे श्यामा-प्रसादमुखर्जीणः जीवनं तस्य बलिदान-सम्बद्धश्च एकः अध्यायः समावेशिष्यते।

मुख्यमन्त्री उक्तवान् यत् श्यामा-प्रसादमुखर्जीणः जीवनं विचाराः बलिदानं च दीर्घकालपर्यन्तं पर्याप्तरूपेण जनसमक्षं न प्रस्तुतम्। सः आरोपितवान् यत् अस्य पृष्ठे राजनैतिककारणानि आसन्। अधुना राज्यसर्वकारः तस्य योगदानं समाजस्य प्रत्येकं स्तरं प्रति प्रापयितुं दिशि कार्यं करोति।

श्यामाप्रसादमुखर्जीणः १२५तमजयन्त्य-वसरे राज्यसर्वकारेण सम्पूर्णवर्षं विविधकार्यक्रमान् आयोजयितुं योजना कृता अस्ति। अस्यैव क्रमे तस्य जीवनकार्यसम्बद्धान् निर्णयान् कर्तुं विशेषसमितिः गठिता अस्ति। गुरुवासरे समितेः प्रथमसभायां बहवः महत्त्वपूर्णाः निर्णयाः गृहीताः।

मुख्यमन्त्री अवदत् यत् श्यामाप्रसाद-मुखर्जीणः जीवनी तस्य आत्मबलिदानं च विद्यालयेभ्यः आरभ्य विश्वविद्यालयपर्यन्तं पाठ्यक्रमेषु समा-वेशिष्यते। तदतिरिक्तं तस्य जीवनम् आधृत्य पृथक् पुस्तकम् अपि प्रकाशितं भविष्यति।

सः उक्तवान् यत् श्यामाप्रसादमुखर्जी यया संस्थया कदाचित् सम्बद्धः आसीत्, तस्याः संस्थायाः उपक्रमेण तथागत-रायस्य प्रयासेन एकं पुस्तकं सज्जीकृतम् अस्ति। राज्यसर्वकारस्य इच्छा अस्ति यत् सम्बद्धसंस्थया सह मिलित्वा तस्य पुस्तकस्य प्रकाशनं क्रियेत। तदनन्तरं राज्यस्य पुस्तकालयविभागाय श्यामा-प्रसादमुखर्जीणः विस्तृतजीवनीम् आधृत्य पृथक् पुस्तकं सज्जीकर्तुं निर्देशः अपि दत्तः।

इदं पुस्तकं बाङ्ग्लाभाषायां आङ्ग्ल-भाषायां च प्रकाशितं भविष्यति। सर्वकारस्य आशा अस्ति यत् अस्य कार्यं वर्षस्य अन्तः पूर्णं भविष्यति।

सर्वकारेण हुगलीजनपदस्य जीराट्-नगरे श्यामाप्रसादमुखर्जीणः पैतृकनिवासस्य संरक्षणस्य पुनरुद्धारस्य च कार्यमपि प्रारब्धम् अस्ति। तत्र स्थितस्य पुस्तका-लयस्य विकासः क्रियते। तदतिरिक्तं तस्य जीवनं योगदानं च सम्बद्ध्य एकं सङ्ग्रहालयम् अपि निर्मीयते। मुख्यमन्त्री गुरुवासरे एतस्य विषये पुनः सूचनां दत्त्वा उक्तवान् यत् सर्वकारः श्यामाप्रसाद-मुखर्जीणः परम्परां भाविवंशेभ्यः प्रापयितुं विभिन्नस्तरेषु कार्यं करोति।

Hindusthan Samachar / Divya Ranjan