सुपौलम्, १९ अगस्तमासः (हि.स.)। पूर्वमुख्यमन्त्रिणः स्वर्गीयस्य डॉ. जगन्नाथमिश्रस्य पुण्यतिथेः अवसरे बुधवासरे मुख्यमन्त्री सम्राट् चौधरी सुपौलजनपदस्य बलुआविपणं प्राप्तवान्। तत्र आयोजिते कार्यक्रमे तेन पूर्व-मुख्यमन्त्रिणः डॉ. जगन्नाथमिश्रस्य प्रतिमायाः अनावरणं कृतम्। मुख्यमन्त्रिणः आगमनं दृष्ट्वा बलुआविपणे जनानां मध्ये विशेषः उत्साहः आसीत् तथा च बहुसंख्यकाः स्थानीयजनाः कार्यक्रमस्थले समागताः। प्रतिमायाः अनावरणानन्तरं मुख्यमन्त्री निर्माणाधीनस्य कोसी-मेची-अन्तर्राज्यीयसम्पर्कपरियोजनायाः कार्यस्थलस्य निरीक्षणं कृतवान्।

सः अधिकारिभ्यः परियोजनायाः प्रगति-विषये अद्यावधि सम्पन्नानां कार्याणां च विषये सूचनां प्राप्तवान्। ततः अधिकारिभिः सह समीक्षासभां कृत्वा परियोजना-सम्बद्धान् आवश्यकान् निर्देशान् दत्तवान्। मुख्यमन्त्रिणः यात्रां दृष्ट्वा जनपदप्रशासनेन सुरक्षा, यातायात-व्यवस्था, वाहनस्थापन-व्यवस्था अन्याः च व्यवस्थाः प्रति व्यापकाः सज्जताः कृताः आसन्। जनपदाधिकारी सावन-कुमारः, आरक्षकाधीक्षकः शरथः आर.एस. इत्येताभ्यां सह त्रिवेणीगञ्जस्य वीरपुरस्य च अनुमण्डलाधिकारिणः विनयकुमारः, अनुमण्डलपुलिसाधिकारी अन्ये च अधिकारी निरन्तरं कार्यक्रम-स्थलस्य निरीक्षणं कृत्वा सज्जतायाः स्थितिं ज्ञातवन्तः। जनपदा-धिकारी अपि गतेषु कतिपयेषु दिवसेषु बलुआं गत्वा व्यवस्थायाः समीक्षां कृतवान् आसीत्।

मुख्यमन्त्रिणः बलुआविपणं प्राप्तेः समये स्थानीयजनैः क्षेत्राय प्रखण्डस्य मान्यतां प्रदातुं याचना अपि उत्थापिता। जनैः उक्तं यत् बलुआं प्रखण्डरूपेण स्थापयितुं दीर्घकालात् आग्रहः क्रियते। मुख्यमन्त्रिणः समक्षं याचना प्रस्तुता अनन्तरं स्थानीयजनानां मध्ये सर्वकारात् अस्मिन् दिशि सकारात्मकप्रयत्नस्य आशा उत्पन्ना अस्ति।

डॉ. जगन्नाथमिश्रस्य जन्म २४ जूनमासे १९३७ तमे वर्षे सुपौलजनपदस्य बलुआविपणे अभवत्। तेन अर्थशास्त्रे उच्चशिक्षां प्राप्य विद्यावारिधेः उपाधिः अपि प्राप्ता। ततः सः बिहारविश्वविद्यालयस्य एल.एस. महाविद्यालये अर्थशास्त्रस्य प्राध्यापकरूपेण कार्यं कृतवान्। छात्रजीवनादेव काङ्ग्रेसदले सम्बद्धः डॉ. मिश्रः अनन्तरं सक्रियां राजनीतिं प्रविष्टवान्।

डॉ. जगन्नाथमिश्रः त्रिवारं बिहारस्य मुख्यमन्त्री अभवत्। तस्य प्रथमः कार्यकालः १९७५ तः १९७७ पर्यन्तम्, द्वितीयः कार्यकालः १९८० तः १९८३ पर्यन्तम्, तृतीयः कार्यकालः १९८९ तः १९९० पर्यन्तम् आसीत्। केन्द्रसर्वकारेऽपि तेन ग्रामीण-विकासमन्त्रित्वेन कृषिमन्त्रित्वेन च दायित्वं निर्वहितम्। दीर्घकालीनरोगेण पीडितस्य तस्य १९ अगस्तमासे २०१९ दिनाङ्के नवदिल्ली इत्यत्र निधनम् अभवत्।

तस्य पुण्यतिथेः अवसरे बलुआविपणे प्रतिमानावरणकार्यक्रमः आयोजितः। कार्यक्रमं दृष्ट्वा क्षेत्रस्य जनानां मध्ये विशेषः उत्साहः दृष्टः। प्रतिमायाः अनावरणं परियोजनास्थलस्य निरीक्षणं च कृत्वा मुख्यमन्त्री ततः पटनानगरं प्रति प्रस्थितवान्।

Hindusthan Samachar / Divya Ranjan