देहरादूनम्, ०६ अगस्तमासः (हि.स.)। राज्यपालः कुलाधिपतिश्च सेवानिवृत्त-लेफ्टिनेण्ट-जनरल गुरमीत-सिंहः उक्तवान् यत् एकविंशतितम-शताब्द्याः आव्हानानामनुरूपं विश्वविद्यालयैः युवानः कृत्रिमबुद्ध्या समर्थान्, उद्योगाभिमुखान् तथा राष्ट्रनिर्माणाय सज्जा: कर्तव्याः। तेन उक्तं यत् विश्वविद्यालयानां दायित्वं केवलं उपाधि-प्रदानपर्यन्तं सीमितं नास्ति, अपितु विद्यार्थिनः रोजगाराय, उद्योगाय, समाजाय, राष्ट्राय च सक्षमाः कर्तुमपि तेषां उत्तरदायित्वम् अस्ति।

राज्यपालः गुरुवासरे लोक-भवने आयोजितां उत्तराखण्डस्य स्ववित्तपोषित-विश्वविद्यालयानां कुलपतिसभाम् सम्बोधयन् आसीत्। अस्यां सभायां त्रयोदश-निजी-विश्वविद्यालयानां कुलपतयः सहभागिनः अभवन्।

तेन उक्तं यत् विश्वविद्यालयात् निष्क्रामन् प्रत्येकं विद्यार्थी कौशलसम्पन्नः, प्राविधिकदृष्ट्या समर्थः तथा सामाजिक-उत्तरदायित्वेषु जागरूकः भवेत्, येन सः विकसित-भारत-२०४७, आत्मनिर्भर-भारतस्य तथा भारतस्य विश्वगुरुत्व-स्थापनस्य सङ्कल्पे योगदानं दातुं समर्थः भवेत्।

राज्यपालेन अनुसन्धानस्य, नवोन्मेषस्य, आधिपत्यस्य तथा बौद्धिक-सम्पदा-अधिकाराणां प्रोत्साहने बलं दत्तम्। तेन उक्तं यत् केवलम् अनुसन्धानं पर्याप्तं नास्ति, अपितु तत् अधिकार-प्राप्तौ, प्रकाशने, समाजोपयोगि-प्रौद्योगिक्यां च परिणमितव्यम्। तेन विश्वविद्यालयान् प्रति दत्तांश-सुरक्षा, साइबर-सुरक्षा तथा उन्नत-प्रौद्योगिकी-क्षेत्रेषु दक्ष-मानव-संसाधन-निर्माणस्य आह्वानं कृतम्।

तेन उक्तं यत् विश्वविद्यालयैः स्वीयाः श्रेष्ठ-उपलब्धयः, अनुसन्धानानि, नवोन्मेषाश्च अन्यैः सह विनिमेयाः, येन सर्वे संस्थानाः परस्परस्य कार्यप्रणालीतः शिक्षां प्राप्नुयुः। अपि च प्रत्येकस्मात् विश्वविद्यालयात् राष्ट्रस्य, प्रदेशस्य, समाजस्य च सम्बन्धिते कस्मिंश्चिद् महत्त्वपूर्णे विषये दीर्घकालिकं गुणवत्तापूर्णं च अनुसन्धानं कर्तुम् आग्रहः कृतः।

राज्यपालः कृत्रिमबुद्धेः, क्वाण्टम्-प्रौद्योगिक्याः तथा अन्येषां आधुनिक-क्षेत्राणां विषये विश्वविद्यालयैः क्रियमाणानां कार्याणां प्रशंसां कृत्वा उक्तवान् यत् उत्तराखण्डः एतेषु क्षेत्रेषु उत्कृष्टतायाः केन्द्रं भवितुमर्हति। तेन उक्तं यत् विश्वविद्यालयैः व्यावसायिक-हितेभ्यः उपरि उत्थाय समाजस्य, राष्ट्रस्य, मानवतायाश्च हिताय कार्यं कर्तव्यम्।

सभायां कुलपतिभिः अनुसन्धान-प्रोत्साहनम्, अधिकार-संस्कृतेः विकासः, उद्योग-अकादमिक-सहयोगस्य संवर्धनम् तथा विश्वविद्यालयानां मध्ये सहभाग-अनुसन्धान-व्यवस्थायाः सुदृढीकरणम् इत्यादयः बहवः परामर्शाः प्रस्तुताः।

अस्मिन्नवसरे राज्यपालस्य सचिवः रविनाथ-रामन्, विधि-परामर्शदाता कौशल-किशोर-शुक्लः, उच्च-शिक्षा-सचिवः डॉ. बीवीआरसी-पुरुषोत्तमः, अपर-सचिवा रीना-जोशी तथा विभिन्न-निजी-विश्वविद्यालयानां कुलपतयः उपस्थिताः आसन्।

Hindusthan Samachar / Divya Ranjan