नव दिल्ली, 07 अगस्तमासः (हि.स.)।

भारतस्य राजधानी देहली पुनरेकवारं वैश्विकवाणिज्यक्रियाकलापानां प्रमुखकेन्द्रं भवितुम् उपस्थिता अस्ति। भारतमण्डपे अगस्तमासस्य द्वादशतिथेः आरभ्यमाणः भारतीयवाणिज्यमहोत्सवः देशस्य आर्थिकप्रगतिं वैश्विकवाणिज्यमहत्त्वाकाङ्क्षां च प्रतिपादयितुं महत्त्वपूर्णं मञ्चं भविष्यति। भारतीयवाणिज्यमहोत्सवस्य २०२६ तमवर्षीयस्य उद्घाटनं केन्द्रीयगृहमन्त्री अमितशाहः करिष्यति। अस्मिन् कार्यक्रमे केन्द्रीयमन्त्री पीयूषगोयलः देहल्याः मुख्यमन्त्री रेखागुप्ता च अपि उपस्थितौ भविष्यतः।

कॉन्फेडरेशन ऑफ ऑल इण्डिया ट्रेडर्स तथा इण्डिया ट्रेड प्रमोशन ऑर्गेनाइजेशन इत्येतयोः संयुक्ततत्त्वावधानेन अगस्तमासस्य द्वादशतिथेः पञ्चदशतिथिपर्यन्तम् आयोज्यमानस्य भारतीयवाणिज्यमहोत्सवस्य विषये अद्य आयोजितायां पत्रकारसम्मेलनायां सांसदः कैटसंस्थायाः राष्ट्रियमहामन्त्री प्रवीणखण्डेलवालः एतां सूचनां दत्तवान्। सः अवदत् यत् भारतस्य वाणिज्यिकानां औद्योगिकानाम् उद्यमशीलक्षमतानां च वैश्विकमञ्चे प्रतिष्ठापनस्य उद्देश्येन भारतीयवाणिज्यमहोत्सवः २०२६ देशस्य आर्थिकइतिहासे नूतनम् अध्यायं लिखिष्यति।

सः अवदत् यत् केन्द्रीयगृहसहकारितामन्त्री अमितशाहः अगस्तमासस्य द्वादशतिथौ नवदेहलीस्थिते भारतमण्डपे अस्य महोत्सवस्य उद्घाटनं करिष्यति। तेन सह केन्द्रीयवाणिज्यौद्योगिकमन्त्री पीयूषगोयलः, देहल्याः मुख्यमन्त्री रेखागुप्ता, कैटसंस्थायाः रणनीतिपरामर्शदात्री स्मृतिईरानी च अपि उपस्थिताः भविष्यन्ति। तदतिरिक्तम् अन्ये केन्द्रीयमन्त्रिणः, वरिष्ठप्रशासकाः, उद्योगजगतः प्रमुखप्रतिनिधयः, विभिन्नदेशानां वाणिज्यप्रतिनिधिमण्डलानि च अस्मिन् महोत्सवे सहभागिनः भविष्यन्ति।

कैटसंस्थायाः राष्ट्रियमहामन्त्री अवदत् यत् भारतमण्डपे आयोज्यमानः भारतीयवाणिज्यमहोत्सवः २०२६ प्रधानमन्त्रिणः नरेन्द्रमोदिनः वोकल फॉर लोकल, लोकल टू ग्लोबल, आत्मनिर्भरभारत इत्येतानां सङ्कल्पानां व्यावहारिकसाकाररूपम् ऐतिहासिकम् आयोजनम् अस्ति। अस्मिन् महोत्सवे चत्वारिंशताधिकदेशेभ्यः प्रतिनिधयः, सप्तशताधिकाः प्रदर्शकाः, सहस्रशः निवेशकाः च सहभागीभविष्यन्ति। अस्य महोत्सवस्य उद्देश्यं भारतीयनिर्मातृभ्यः, वणिजेभ्यः, नवोद्यमसंस्थाभ्यः, लघुमध्यमोद्यमेभ्यः, महिला उद्यमिभ्यः, शिल्पिभ्यः, सेवाक्षेत्रस्य प्रतिभाभ्यश्च तादृशं मञ्चं प्रदातुम् अस्ति, यतः ते केवलं भारते एव न, अपितु सम्पूर्णविश्वस्य विपणिषु अपि स्वस्थानं निर्मातुं समर्थाः भविष्यन्ति।

खण्डेलवालः अवदत् यत् भारतीयवाणिज्यमहोत्सवः २०२६ अद्यावधि देशस्य बृहत्तमः मेड इन इण्डिया वाणिज्यसमारोहः अस्ति, यः पूर्णतया भारतीयोत्पादैः, सेवाभिः, प्रौद्योगिकीभिः, नवोन्मेषैश्च समर्पितः अस्ति। देशस्य विभिन्नराज्येभ्यः सप्तशताधिकाः प्रदर्शनीस्थानकानि अस्मिन् महोत्सवे सहभागित्वं वहन्ति। लक्षशः वाणिज्यदर्शकाः, संस्थागतक्रेतारः, उद्योगपतयः, उद्यमिनश्च अस्मिन् सम्मिलिताः भविष्यन्ति इति सम्भावना अस्ति। तदतिरिक्तं चत्वारिंशताधिकदेशेभ्यः आगच्छन्ति वाणिज्यप्रतिनिधिमण्डलानि क्रेतारश्च अस्य महोत्सवस्य वास्तविकवैश्विकवाणिज्यमञ्चत्वं सुदृढं करिष्यन्ति।

सः अवदत् यत् अस्य महोत्सवस्य प्रमुखं वैशिष्ट्यम् एतत् अस्ति यत् अत्र निर्माता निर्यातकः, नवोद्यमसंस्था बृहद्योगः, महिला उद्यमिनी ग्रामीणशिल्पी, पारम्परिकव्यवसायः आधुनिकप्रौद्योगिकीकम्पनी च इत्यादयः सर्वे एकस्मिन् एव मञ्चे समागच्छन्ति। चतुर्दिनात्मकस्य अस्य महोत्सवस्य अवधौ क्रेतृविक्रेतृसम्मेलनानि, व्यवसायव्यवसाय तथा व्यवसायसर्वकार नेटवर्कसत्राणि, निवेशनिर्यातसंवादाः, नवोद्यमप्रदर्शनानि, प्रौद्योगिकीप्रदर्शन्यः, विशेषविषयेषु परिचर्चाश्च वाणिज्यविस्तारस्य नूतनद्वाराणि उद्घाटयिष्यन्ति।

---------------

Hindusthan Samachar / Dheeraj Maithani