हणोलम् (गुजरातम्), 09 अगस्तमासः (हि.स.)।

केन्द्रीययुवकार्यक्रमक्रीडामन्त्री डॉ. मनसुखमाण्डवियः रविवासरे गुजरातस्य हणोलनगरात् ‘फिट् इण्डिया सण्डे ऑन साइकिल’ इत्यस्य पञ्चाशीतितमसंस्करणस्य नेतृत्वं कृतवान्। अस्मिन् अवसरे युवभिः, मायभारत् तथा राष्ट्रियसेवायोजनया (एनएसएस) सम्बद्धैः प्रतिभागिभिः ‘नशामुक्तभारत’ इति सामूहिकः सङ्कल्पः स्वीकृतः। अभियानस्य सन्देशः आसीत् - ‘स्वास्थ्याय आमन्त्रणं कुर्वन्तु, मादकद्रव्येभ्यः निषेधं कुर्वन्तु।’

युवकार्यक्रमक्रीडामन्त्रालयस्य पक्षतः फिट् इण्डिया अभियानस्य अन्तर्गतं आयोजितस्य अस्य कार्यक्रमस्य उद्देश्यम् युवानः मादकद्रव्येभ्यः दूरं स्थापयित्वा स्वास्थ्यसुदृढतां स्वस्थजीवनशैल्याः सकारात्मकविकल्परूपेण प्रोत्साहितुम् आसीत्।

डॉ. माण्डविया ‘सण्डे ऑन साइकिल’ इत्येतत् जनान्दोलनम् इति कथयन् उक्तवान्, “मम हर्षः अस्ति यत् प्रधानमन्त्रिणः फिट् इण्डिया आन्दोलनं अग्रे नेतुं एषा पहलः बृहद् आन्दोलनरूपेण विकसितवती अस्ति। देशस्य दशसहस्राधिकेषु स्थानेषु युवभिः साइकिलचालनस्य माध्यमेन एषः सन्देशः प्रसारितः अस्ति।”

डॉ. माण्डविया २०२४ तमस्य वर्षस्य दिसम्बरमासे ‘सण्डे ऑन साइकिल’ इत्यस्य प्रारम्भं कृतवान् आसीत्। ततः आरभ्य सम्पूर्णे देशे त्रिंशल्लक्षाधिकाः जनाः अस्मिन् अभियाने सहभागितां कृतवन्तः।

दिल्लीमध्ये सहस्राधिकैः जनैः नशामुक्तेः सङ्कल्पः स्वीकृतः

दिल्लीमध्ये अस्य कार्यक्रमस्य मुख्यायोजनं मेजर ध्यानचन्द राष्ट्रियक्रीडाङ्गणे आयोजितम्। कार्यक्रमस्य प्रमुखाकर्षणं सामूहिकः ‘नशामुक्तभारत’ सङ्कल्पः आसीत्, यस्मिन् सहस्राधिकैः प्रतिभागिभिः मादकद्रव्येभ्यः मुक्तं जीवनं यापयितुं तथा स्वपरिवारं, मित्राणि समुदायं च स्वस्थजीवनशैलीं स्वीकर्तुं प्रेरयितुं सङ्कल्पः स्वीकृतः।

रविवासरे प्रातः पञ्चवादनात् पूर्वमेव सहस्राधिकाः जनाः क्रीडाङ्गणं प्राप्तवन्तः। प्रतिभागिभिः योगाभ्यासे तथा जुंबा इत्यादिषु गतिविधिषु सहभागिता कृता। ततः इण्डिया गेट् तथा कर्तव्यपथस्य परितः पञ्चकिलोमीटरपरिमितं साइकिलयानं कृतम्।

कार्यक्रमे कैरम्, शतरञ्जम्, लूडो तथा बैडमिण्टन इत्येतेषां कृते क्रीडाक्षेत्रमपि निर्मितम्। तदतिरिक्तं रज्ज्वाकर्षणं तथा बाधाधावनम् इत्यादीनि स्वास्थ्यवर्धकानि क्रियाकलापानि अपि आयोजितानि।

कार्यक्रमे अभिनेता तथा आदर्शपुरुषः सिद्धार्थनिगमः, अन्ताराष्ट्रियस्क्वैश्-क्रीडकः कनिष्ठराष्ट्रियविजेता च गुरवीरसिंहः, फिट् इण्डिया-दूतः नरेन्द्रकुमारः तथा फिट् इण्डिया-विजेता प्रसिद्धः जुंबाप्रशिक्षकः मीनलपाठकः अपि सहभागितां कृतवन्तः।

सिद्धार्थनिगमः उक्तवान् - स्वास्थ्यं मादकद्रव्यस्य स्थाने स्वीकरोतु

साइकिलयानं पूर्णं कृत्वा अभिनेता तथा जिम्नास्ट् सिद्धार्थनिगमः उक्तवान्, “प्रातः पञ्चवादने बहिः आगमनं तथा सम्पूर्णे दिल्लीनगरे जनान् एतादृशेन ऊर्जया उत्साहेन च साइकिलचालनं कुर्वतः द्रष्टुं रमणीयः अनुभवः आसीत्। ‘नशामुक्तभारत’ इति विषयाधारेण आयोजितः फिट् इण्डिया सण्डे ऑन साइकिल कार्यक्रमः एतं दृढं सन्देशं ददाति यत् हानिकारकस्य मादकद्रव्यस्य स्थाने अस्माभिः स्वास्थ्यं, कठोरपरिश्रमं तथा स्वलक्ष्यप्राप्तेः अभ्यासं स्वीकरणीयम्।

क्रीडकत्वेन जिम्नास्टिक्-क्रीडया मह्यं शिक्षितं यत् अनुशासनं श्रेष्ठमनुष्यत्वस्य प्रमुखा कुञ्जिका अस्ति। अहं सर्वेभ्यः आग्रहं करोमि यत् मादकद्रव्येभ्यः, धूम्रपानेभ्यः मद्यपानेभ्यश्च दूरं तिष्ठन्तु, स्वशरीरस्य ध्यानं कुर्वन्तु तथा प्रतिदिनं न्यूनातिन्यूनं त्रिंशत् निमेषान् स्वास्थ्यवर्धनाय समर्पयन्तु। स्वास्थ्यस्य मात्रा प्रतिदिनं अर्धहोराकालः।”

गुरवीरसिंहः युवभ्यः प्रतिदिनं त्रिंशत् निमेषान् व्यायामस्य आग्रहं कृतवान्

अन्ताराष्ट्रियस्क्वैश्-क्रीडकः गुरवीरसिंहः उक्तवान्, “फिट् इण्डिया तथा नशामुक्तभारत् युवानः स्वास्थ्यस्य दिशि प्रेरयतः तथा मादकद्रव्येभ्यः दूरं स्थापयतः उत्कृष्टे उपक्रमे स्तः। प्रत्येकं जनः प्रतिदिनं न्यूनातिन्यूनं त्रिंशत् निमेषान् शारीरिकक्रियाकलापाय समर्पयेत्।

सः राष्ट्रमण्डलक्रीडासु भारतस्य प्रदर्शनस्यापि प्रशंसां कृत्वा उक्तवान्, “राष्ट्रमण्डलक्रीडासु भारतस्य उनचत्वारिंशत्पदकानां प्रदर्शनमपि अत्यन्तं प्रशंसनीयम् अस्ति तथा अस्माकं क्रीडकैः देशः गौरवान्वितः कृतः।”

---------------

Hindusthan Samachar / Dheeraj Maithani