मुम्बई, १४ सेप्टेम्बरमासः (हि.स.)। केन्द्रीयगृहमन्त्रालयस्य राजभाषाविभागेन प्रवर्तननिदेशालयस्य (ईडी) हिन्दी-गृहपत्रिका ‘प्रवर्तनसन्देश’ इत्यस्यै २०२५-२६ तमस्य वर्षस्य प्रतिष्ठितः ‘राजभाषाकीर्तिपुरस्कारः’ (‘क’ क्षेत्रे द्वितीयपुरस्कारः) प्रदत्तः।

मुम्बय्यां आयोजितस्य ‘हिन्दीदिवस-२०२६’ इत्यस्य षष्ठस्य अखिलभारतीय-राजभाषासम्मेलनस्य च समये केन्द्रीय-गृहराज्यमन्त्रिभ्यां बी. सञ्जयकुमार-महोदयेन नित्यानन्दराय-महोदयेन च अयं पुरस्कारः प्रदत्तः। अयं कार्यक्रमः केन्द्रीयगृहमन्त्रिणः सहकारितामन्त्रिणश्च अमितशाहस्य अध्यक्षतायां सम्पन्नः।

ईडी-अनुसारं ‘प्रवर्तनसन्देशः’ निदेशालयस्य आन्तरिकी हिन्दीपत्रिका अस्ति। अस्याः माध्यमेन निदेशालयस्य कार्यक्षेत्रसम्बद्धाः जटिलाः विधिकाः, वित्तीयाः अन्वेषणसम्बद्धाः च तान्त्रिकविषयाः तथा राजभाषाहिन्दी-सम्बद्धाः गतिविधयः सरलया, सहजया प्रभावीभाषया च प्रस्तुताः क्रियन्ते। पत्रिकायाः प्रमुखम् उद्देश्यं निदेशालयस्य बहु-आयामिनां कार्याणां हिन्दीभाषया सामान्यजनानाम् अधिकारिणां च समक्षं प्रस्तुतीकरणेन सह शासकीयकार्येषु राजभाषायाः प्रगतिशील-प्रयोगं सुदृढं कर्तुम् अस्ति।

२०२५-२६ तमे वर्षे प्रकाशितस्य पत्रिकायाः नवमाङ्कस्य मुख्यविषयः ‘आतङ्कवित्त-पोषणस्य विरुद्धम् ईडी-संस्थायाः अभियानम्’ इति आसीत्। अस्मिन् आतङ्कवित्तपोषणस्य विरुद्धं संस्थया कृतानां कार्यवाहीणां, वित्तीयापराधानां तथा देशस्य आर्थिक-राष्ट्रियसुरक्षाभ्यां सम्बद्धानां संवेदनशील-पक्षाणां च विस्तरेण प्रस्तुतीकरणं कृतम् आसीत्। दशमाङ्कस्य केन्द्रीयविषयः ‘जनहितात् देशहितपर्यन्तम् : ईडी-संस्थायाः पीडितकेन्द्रिताः कार्यवाहीः सहायताश्च’ इति निर्धारितः आसीत्। अस्मिन् वित्तीयधोखाधडीना पीडितेभ्यः राहतं प्रदातुं, अपराधजनितस्य धनस्य अन्वेषणं, सम्पत्तीनां निरीक्षणं तथा सम्पत्तीनां अन्तिमरूपेण प्रत्यर्पणं सुनिश्चितं कर्तुं ईडी-संस्थायाः न्यायकेन्द्रितकार्यशैली प्रमुखतया रेखाङ्किता।

उल्लेखनीयं यत् ईडी-संस्थया राजभाषाहिन्दीं स्वस्य संस्थागतकार्य-संस्कृतेः अभिन्नम् अङ्गं कर्तुं निरन्तरम् अभिनवाः प्रयासाः कृताः सन्ति। एतत्पूर्वं २०२४ तमे वर्षे अपि निदेशालयेन गृहमन्त्रालयेन कृत्रिमबुद्धिमत्ता (एआई) इति विषये आयोजितायां अखिलभारतीय-हिन्दी-लघुचलच्चित्रनिर्माणप्रतियोगितायां तृतीयपुरस्कारः प्राप्तः आसीत्।

Hindusthan Samachar / Divya Ranjan