पूर्वसिंहभूमिः, १४ सेप्टेम्बरमासः (हि.स.)। सीएसआईआर-राष्ट्रीयधातुकर्म-प्रयोगशालायां सोमवासरे हिन्दी-सप्ताहसमारोहस्य शुभारम्भः अभवत्। १४ तः २२ सेप्टेम्बरपर्यन्तम् आयोजितस्य समारोहस्य अध्यक्षता प्रयोगशालायाः निदेशकः डॉ. सन्दीपघोषचौधरी कृतवान्। साहित्यकारः डॉ. अरुणसज्जनः मुख्यातिथिरूपेण उपस्थितः आसीत्।

मुख्यातिथिः डॉ. अरुणसज्जनः स्वीयसम्बोधने अवदत् यत् हिन्दी केवलं भाषा नास्ति, अपितु भारतीयसंस्कारस्य संस्कृतेश्च परिचायिका अस्ति। संस्कृतभाषातः विकसितायाः हिन्दी-भाषायाः सरलता वैज्ञानिकस्वभावश्च तां सहजभाषां करोति। हिन्दी यथा उच्चार्यते, सामान्यतः तथैव लिख्यते अपि, अतः तस्याः अध्ययनं बोधनं च सुकरं भवति।

सः अवदत् यत् तकनीकी-वैज्ञानिकोपलब्धीनां जनसामान्यं प्रति सरलतया प्रभाविरूपेण च प्रसारणे हिन्दी महत्त्वपूर्णां भूमिकां निर्वोढुं शक्नोति। वैज्ञानिकसंस्थासु क्रियमाणानां अनुसन्धानानां लाभः व्यापकसमाजं प्रति तदैव प्राप्स्यति, यदा तस्याः सूचना जनसामान्यस्य बोधगम्यायां भाषायां उपलब्धा भविष्यति। सः विश्वव्यापारस्य विस्तारक्षेत्रेऽपि हिन्दीभाषायाः सम्भावनानाम् उल्लेखं कृतवान्।

अध्यक्षीयसम्बोधने निदेशकः डॉ. सन्दीपघोषचौधरी अवदत् यत् राष्ट्रीयधातुकर्मप्रयोगशालायां प्रतिवर्षं हिन्दी-सप्ताहस्य आयोजनं क्रियते। हिन्दी राजभाषा इति कारणेन तस्याः प्रचारप्रसारस्य अधिकाधिकप्रयोगस्य च दायित्वं सर्वेषाम् अस्ति।

सः अवदत् यत् हिन्दीभाषया सह देशस्य संस्कृतिः, संस्काराः, परम्पराश्च सम्बद्धाः सन्ति। वैज्ञानिकसंस्थानां दायित्वमस्ति यत् तैः स्वेषां शोधानां उपलब्धीनां च अधिकाधिकजनानां समीपं प्रसारणं क्रियेत। अस्मिन् कार्ये हिन्दी प्रभावी माध्यमं सिद्धा भवितुम् अर्हति।

प्रयोगशालायाः हिन्दी-अधिकारी डॉ. रानूवर्मा हिन्दी-सप्ताहस्य अवधौ आयोजितानां कार्यक्रमानां रूपरेखां प्रस्तुतवती। सा अवदत् यत् १४ तः २२ सेप्टेम्बरपर्यन्तं प्रयोगशालापरिसरे हिन्दीसम्बद्धाः विविधाः कार्यक्रमाः प्रतियोगिताश्च आयोजिताः भविष्यन्ति।

Hindusthan Samachar / Divya Ranjan