कोलकाता, २० सेप्टेम्बरमासः (हि.स.)। दिल्लीविश्वविद्यालयछात्रसङ्घस्य निर्वाचने अखिलभारतीयविद्यार्थिपरिषदः विजयम् अधिगते सति मुख्यमन्त्री शुभेन्दु-अधिकारी हर्षं प्रकटितवान्। सः सामाजिकमाध्यमे ‘एक्स’ इत्यत्र प्रकाश्य एतद्विजयं युवाशक्तेः राष्ट्रवादस्य च विजयः इति वर्णितवान्।

मुख्यमन्त्री अधिकारी स्वसन्देशे अवदत् यत् दिल्लीविश्वविद्यालयस्य छात्रैः मतदानस्य माध्यमेन एबीवीपी-प्रत्याशिनां पक्षे स्वसमर्थनं प्रदर्श्य छात्रराजनीतिं प्रति स्पष्टः सन्देशः प्रदत्तः। सः दावां कृतवान् यत् देशस्य छात्राः युवानश्च राष्ट्रवादस्य, सकारात्मकछात्रराजनीतेः एबीवीपी-सङ्गठनस्य च पक्षे स्थिताः सन्ति।

सः अवदत् यत् छात्रसङ्घस्य चतुर्षु प्रमुखपदेषु अध्यक्षपदसहितेषु त्रिषु महत्त्वपूर्णपदेषु एबीवीपी-प्रत्याशिभिः विजयः प्राप्तः। अध्यक्षपदे यशः २४ सहस्र ५७६ मतानि प्राप्य विजयं प्राप्तवान्। सचिवपदे रियायै २१ सहस्र ६५० मतानि प्राप्तानि। संयुक्तसचिवपदे लक्ष्यराजः १६ सहस्र ६१५ मतानि प्राप्य विजयं प्राप्तवान्।

मुख्यमन्त्री एबीवीपी-सङ्गठने विश्वासं प्रकटितवद्भ्यः दिल्लीविश्वविद्यालयस्य छात्रेभ्यः कृतज्ञतां प्रकटितवान्। तथैव निर्वाचने विजयं प्राप्तवद्भ्यः नूतननेतृत्वाय, विजयस्य कृते कार्यं कृतवद्भ्यश्च सङ्गठनस्य कार्यकर्तृभ्यः शुभकामनाः प्रदत्तवान्। छात्रहिताय राष्ट्रनिर्माणाय च स्वप्रतिबद्धतां निरन्तरं धारयितुं सः उक्तवान्।

Hindusthan Samachar / Divya Ranjan