मेदिनीपुरम्, २० सेप्टेम्बरमासः (हि.स.)। नन्दिग्राम-विधानसभायाः उपनिर्वाचनात् पूर्वं काङ्ग्रेसस्य प्रत्याशिनः मिलन-प्रधानस्य ग्रहणानन्तरं राजनैतिक-गतिविधयः तीव्राः अभवन्। शुक्रवासरे ग्रहणानन्तरं शनिवासरे हल्दिया-न्यायालयेन तं १४ दिनानां न्यायिकबन्धने प्रेषितम्। नन्दिग्रामे ६ अक्टोबर-दिनाङ्के मतदानं भविष्यति। अस्मिन् मध्ये काङ्ग्रेस-पक्षेण उक्तं यत् तस्य प्रत्याशी कारागारादेव स्वनिर्वाचन-सङ्घर्षं निरन्तरं करिष्यति।

शनिवासरे मिलनप्रधानः हल्दिया-न्यायालये उपस्थापितः। न्यायालयेन तं १४ दिनानां न्यायिकबन्धने प्रेषितम्। सोमवासरे तं अन्यस्मिन् प्रकरणे कान्थिन्यायालये उपस्थापयिष्यते। अतः मतदानसमयपर्यन्तं तस्य कारागारात् बहिरागमनस्य सम्भावना न्यूना मन्यते।

न्यायालयपरिसरे प्रदेशकाङ्ग्रेसाध्यक्षः शुभङ्करसर्वकारः अपि उपस्थितः आसीत्। सः आरोपितवान् यत् निर्वाचनात् पूर्वं आरक्षिबलं प्रयुज्य काङ्ग्रेसस्य प्रत्याशी गृहीतः। सः अवदत् यत् दलं राजनैतिकस्तरे न्यायिकस्तरे च स्वसङ्घर्षं निरन्तरं करिष्यति।

प्रदेशकाङ्ग्रेसाध्यक्षः कथनं कृतवान् यत् येषां जनानां हत्यायाः आरोपः प्रकरणे कृतः अस्ति, तेषां परिवारजनैः कापि सूचना न कृता। सः एतदपि आरोपितवान् यत् प्रकरणे नामाङ्किताः अन्ये जनाः न गृहीताः। काङ्ग्रेस-पक्षेण ग्रहणस्य पृष्ठे राजनैतिकोद्देश्यस्य आरोपः कृतः।

आरक्षिबलस्य अनुसारं २००७ तमे वर्षे नन्दिग्राम-आन्दोलने समये सोनाचूडा-ग्रामपञ्चायतस्य गाङ्गडा-निवासिनः मिलनप्रधानस्य विरुद्धं खेजुरी-आरक्षिकेन्द्रे एकं तथा नन्दिग्राम-आरक्षिकेन्द्रे त्रीणि प्रथमसूचनापत्राणि पञ्जीकृतानि आसन्। एतेषु हत्यायाः, हत्याप्रयासस्य, अपहरणस्य च सहिताः अनेकाः अजामीनय्याः धाराः समाविष्टाः आसन्। आरक्षिबलस्य कथनानुसारं एतेषु प्रकरणेषु न्यायालयेन पूर्वमेव तस्य विरुद्धं अजामीनय्यं ग्रहणादेशपत्रं निर्गतं कृतम् आसीत् तथा सः विगतानि १९ वर्षाणि पलायितः आसीत्। निर्वाचनायोगस्य निर्देशानुसारं तस्मादेव ग्रहणादेशपत्रात् तं गृहीतम्।

मिलनप्रधानस्य अधिवक्ता विमलमाझी आरोपितवान् यत् १९ वर्षपुरातनं प्रकरणं पुनः सक्रियं कृत्वा तस्य मुवक्किलं गृहीतम्। तस्य कथनानुसारं आरक्षिबलस्य निरीक्षणे एव मिलनप्रधानः नन्दिग्राम-उपनिर्वाचनाय नामाङ्कनपत्रं समर्पितवान् आसीत्। एवं सति तदा तस्य ग्रहणं किमर्थं न अभवत्, इति प्रश्नः अस्ति। अपरतः शासनपक्षस्य अधिवक्ता विजयः रामः अवदत् यत् मिलनप्रधानः दीर्घकालात् पलायितः आसीत्, अतः तस्य ग्रहणे विलम्बः अभवत्।

Hindusthan Samachar / Divya Ranjan