नवदिल्ली, २० सेप्टेम्बरमासः (हि.स.)। सङ्गीतनाटक-अकादम्याः उपसचिवः सुमनकुमारः अत्र अवदत् यत् हिन्दीभाषायां युवनाटककाराणां संख्या निरन्तरं वर्धते, इति हर्षस्य विषयः अस्ति। कुमारः शनिवासरे दिल्लीस्थस्य श्रीरामकेन्द्रस्य पुरतः सञ्जनाबुक्स इत्यस्य ‘साहित्यस्य वृक्षः’ इति पुस्तिकाविक्रयकेन्द्रे आयोजिते वरिष्ठ-रङ्गकर्मी नाटककारस्य च आलोकशुक्लस्य चतुर्थनाट्यसङ्ग्रहस्य ‘पतझड़ के फूल और देखोना’ इति पुस्तकस्य लोकार्पणकार्यक्रमे एतत् उक्तवान्।

पुस्तकस्य लोकार्पणं वरिष्ठनाटककारः प्रतापसहगलः, नाटककारः समीक्षकश्च राजेशकुमारः, सङ्गीतनाटक-अकादम्याः उपसचिवः सुमनकुमारः, रङ्गनिर्देशकः प्रदीपबाजपेयी, वरिष्ठलेखिका शशि-सहगलः, अभिनेता श्रीकान्तवर्मा, नाटककारः अनिलठाकुरः तथा सञ्जना-बुक्स-संस्थायाः निदेशिका सञ्जनातिवारी च संयुक्तरूपेण कृतवन्तः।

सुमनकुमारः हिन्दीभाषायां नवीन-नाटकानि न लिख्यन्ते इति सामान्यधारणां निराकुर्वन् अवदत् यत् आलोकशुक्लः इव रचनाकाराः निरन्तरं सक्रियाः सन्ति। रङ्गकर्मिभिः एतेषां समकालीननाटकाणां मञ्चनं कर्तव्यम्।

वरिष्ठनाटककारः प्रतापसहगलः आलोकशुक्लस्य रचनाकर्मणः प्रशंसां कृत्वा अवदत् यत् गम्भीररोगेण पीडितस्य अपि तस्य निरन्तरं लेखने रङ्गनिर्देशने च सक्रियत्वम् प्रेरणादायकम् अस्ति। सः द्वयोः पूर्णदैर्घ्यनाटकयोः प्रकाशनाय लेखकं शुभकामनाभिः अभिनन्दितवान्।

नाटककारः समीक्षकश्च राजेशकुमारः ‘पतझड़ के फूल’ इति नाटकस्य रचनाविन्यासस्य प्रशंसां कृत्वा अवदत् यत् अस्मिन् वृद्धानां मनःस्थितिः केन्द्रे स्थापिता अस्ति तथा च द्वौ पृथक् अन्तौ प्रदत्तौ स्तः। एतद् निर्देशकाय स्वदृष्ट्यनुसारं मञ्चनस्य स्वातन्त्र्यं प्रददाति। अपरस्मिन् ‘देखोना’ इति नाटके चर्चां कुर्वन् सः अवदत् यत् सामाजिकपरिवेशस्य अवगमनाय यथा अद्य मोहनराकेशस्य नाटकानि पठ्यन्ते, तथैव अग्रिमेषु १०–१५ वर्षेषु कोरोनाकालस्य सामाजिकयथार्थस्य अवगमनाय आलोकशुक्लस्य ‘देखोना’ इति नाटकं महत्त्वपूर्णनाट्यतथ्यरूपेण पठिष्यते मञ्चितं च भविष्यति।

अस्मिन् अवसरे रङ्गनिर्देशकः प्रदीपबाजपेयी, अभिनेता श्रीकान्तवर्मा, विपिनकुमारः, शशिसहगलः अनिल-ठाकुरश्च, नाटककारः आलोकशुक्लः, अभिमन्युसिंहचौधरी, शिखामल्होत्रा तथा हिम्मतसिंहनेगी इत्येतै: सह साहित्यरङ्गक्षेत्राभ्यां सम्बद्धाः बहवः जनाः उपस्थिताः आसन्।

Hindusthan Samachar / Divya Ranjan