कोलकाता, २४ सेप्टेम्बरमासः (हि.स.)। अडाणी-समूहस्य अध्यक्षः गौतम-अडाणी गुरुवासरे उक्तवान् यत् भारतस्य अग्रिम-विकासपर्वणः प्रमुख-चालकशक्तिरूपेण पश्चिमबङ्गालस्य उदयः भवितव्यः। सः अवदत् यत् राज्यस्य सामरिकं स्थानं तं ‘विकसितभारतम्’ इति दृष्टिकोणं साकारयितुम् अनिवार्यं करोति।

भारतीय-वाणिज्य-महासभया आयोजिते कार्यक्रमे सम्बोधनं कुर्वन् अडाणी उक्तवान् यत् विगतेषु कतिपयेषु दशकेषु भारतस्य आर्थिकविकासस्य गतिः मुख्यतया देशस्य पश्चिम-दक्षिणभागाभ्यां प्राप्ता अस्ति, किन्तु विकासस्य अग्रिमपर्वणि नूतनाः केन्द्रबिन्दवः भवितुमर्हन्ति। सः स्पष्टतया उक्तवान्, “भारतस्य अग्रिम-एक-ट्रिलियन-डॉलर-विकासाय पूर्वस्य उदयः अनिवार्यः अस्ति। अत्रैव ‘विकसितभारतम्’ इति दृष्टिकोणस्य पूर्तये बङ्गालस्य महत्त्वं भवति।”

राज्यस्य भौगोलिकं लाभं प्रकाशयन् सः उक्तवान् यत् बङ्गालस्य पश्चिमदिशि ओडिशा, झारखण्डं तथा छत्तीसगढं च स्थितानि खनिज-औद्योगिकक्षेत्राणि सन्ति। अपरतः बङ्गालस्य खाडीद्वारा तीव्रगत्या वर्धमानेभ्यः दक्षिण-पूर्व-एशियाईयेभ्यः तथा हिन्द-प्रशान्तक्षेत्रीय-विपणेभ्यः प्रत्यक्षं सम्पर्कः अस्ति। सः उक्तवान् यत् एतादृशः अद्भुतः लाभसमन्वयः देशस्य अन्यस्मिन् कस्मिन्नपि स्थाने न विद्यते।

अडाणी इत्यनेन उद्घोषितं यत् तस्य समूहः अग्रिम-दशके बङ्गाले एकलक्ष-कोटिरूप्यकाणाम् अधिकं निवेशं करिष्यति। एषः महा-निवेशः पत्तनानि, रसद-व्यवस्था, विद्युदुत्पादनम्, विद्युत्प्रेषणं वितरणं च, मार्गाः, सेतवः, रज्जुमार्गाः, हरित-सिमेण्ट तथा अतिविशाल-विवरणकेन्द्राणां निर्माणे विनियोजितः भविष्यति।

आधारभूतसंरचनया सह मानवीय-विकासस्य महत्त्वं प्रतिपादयन् सः उक्तवान् यत् विकासः केवलं मालवाहन-परिमाणेन, मेगावाट्-मात्रया वा टेराबाइट्-मात्रया वा न मापितुं शक्यते; अपितु तस्य “वास्तविकं मापनं गहनरूपेण मानवीयं भवितव्यम्।”

अस्मिन् क्रमे सः न्यूटाउन-नगरे द्विसहस्र-शय्या-युक्तस्य ‘अडाणी आरोग्यमन्दिरस्य’ उल्लेखं कृतवान्। तस्य अर्धाः शय्याः तेषां जनानां कृते आरक्षिताः भविष्यन्ति, ये गुणवत्तापूर्णस्य स्वास्थ्यसेवायाः व्ययं कर्तुं न शक्नुवन्ति। तदतिरिक्तं सः हुगली-नद्याः तीरे कुमारटुली-घाटस्य जीर्णोद्धारस्य, बङ्गालस्य कलाकाराणां वैश्विकस्तरे प्रोत्साहनाय विशेष-दुर्गापूजा-कार्यक्रमस्य तथा ऐतिहासिकस्य ‘राइटर्स बिल्डिङ्ग’ इत्यस्य संरक्षणस्य च प्रतिज्ञां कृतवान्।

गुजरातस्य मुन्द्रा-पत्तनेन सह स्वस्य त्रिदशक-प्राचीनसम्बन्धं स्मरन् उद्योगपतिः भावुकशब्दैः उक्तवान्, “पश्चिमे मुन्द्रा मम प्रथमं कर्मक्षेत्रम् आसीत्। अद्य तेनैव विनयेन उत्तरदायित्वभावनया च पूर्वे बङ्गालः मम द्वितीयं कर्मक्षेत्रं भवेत् इति मम प्रार्थना अस्ति।” सः विशेषतया उक्तवान् यत् बङ्गालेन अधुना स्वस्य भौगोलिकस्य लाभस्य, बौद्धिकस्य सामर्थ्यस्य तथा महान् औद्योगिकस्य विरासतस्य च पूर्णः लाभः स्वीकरणीयः।

Hindusthan Samachar / Divya Ranjan