वाशिंगटनम्, 25 सितंबरमासः (हि.स.)।

चीनदेशस्य राष्ट्रपतिः शी जिनपिङ्गः अमेरिकादेशस्य स्वकीयायां राजकीययात्रायां गुरुवासरे अमेरिकादेशस्य द्विशतपञ्चाशद्वर्षीयेषु इतिहासे अमेरिका चीनयोर्मध्ये अभवन् आदानप्रदानस्य सहकारस्य च विविधान् क्षणान् स्मृतवान्।

शी जिनपिङ्गः वाशिङ्गटनस्य निक्सनस्य च उल्लेखं कृत्वा द्वितीयविश्वयुद्धकाले जापानदेशस्य विरुद्धं चीनदेशस्य अमेरिकादेशस्य च सेनयोर्मध्ये सम्पन्नं सहकार्यम् अवर्णयत्। सः तत् “रक्तेन अग्निना च निर्मिता मैत्री” इति अभिहितवान्।

सीएनएन इत्यस्य प्रतिवेदनानुसारं व्हाइट हाउस इत्यत्र आयोजिते राजकीयभोजे चीनीनेता शी जिनपिङ्गः सर्वप्रथमं जॉर्ज वाशिङ्गटनस्य चीनीमृत्तिकापात्राणां सङ्ग्रहे रुचिम् उल्लिखितवान्। ततः सः द्वितीयविश्वयुद्धकाले जापानदेशस्य विरुद्धं चीनी अमेरिकीययोः सेनयोर्मध्ये सम्पन्नं सहकार्यम् उल्लिख्य तत् “रक्तेन अग्निना च निर्मिता मैत्री” इति वर्णितवान्।

अनन्तरं शी जिनपिङ्गः १९७२ तमे वर्षे अमेरिकादेशस्य पूर्वराष्ट्रपतेः रिचर्ड निक्सनस्य चीनदेशस्य ऐतिहासिकयात्रां स्मृतवान्। निक्सनस्य चीनदेशस्य प्रथमनेतुः माओ त्से तुङ्गस्य च परस्परं हस्तमेलनस्य घटना अमेरिका चीनयोः सम्बन्धानां सामान्यीकरणस्य प्रारम्भस्य कारणम् अभवत्।

शी जिनपिङ्गः भविष्ये सहकार्यार्थम् आह्वानं कुर्वन् अवदत्, “यथा सा नदी या कदापि प्रवाहितुं न विरमति, तथैव इतिहासोऽपि कदापि न विरमति।”

सः अवदत्, “आगच्छन्तु, वयं सर्वे मिलित्वा चीन अमेरिका मैत्र्याः सुन्दराणि पुष्पाणि संवर्धयाम। आगच्छन्तु, वयं सर्वे मिलित्वा अस्माकं मैत्रीपूर्णसम्बन्धानां नूतनम् अध्यायं लिखाम।”

शी जिनपिङ्गः स्वकीयस्य भाषणस्य अन्ते अवदत् यत् अमेरिकादेशस्य राष्ट्रपतेः डोनाल्ड ट्रम्पस्य “मेक अमेरिका ग्रेट अगेन” इति कार्यसूची चीनदेशस्य “महान् राष्ट्रियः पुनरुत्थानः” इति लक्ष्येन सह समन्वितुं शक्नोति।

सः अवदत्, “चीन अमेरिका च उत्तरदायित्वपूर्णयोः प्रमुखदेशयोः रूपेण कार्यं कुर्याताम्। स्वकीयानां जनानाम् आशाः पूरयताम्। कालस्य गतिना सह पदं मिलयित्वा गच्छताम्। प्रमुखदेशानां परस्परं सहजीवनस्य नूतनं मार्गं च अन्विष्यताम्।”

शी जिनपिङ्गः मईमासे राष्ट्रपतिना डोनाल्ड ट्रम्पेण सह सम्पन्नायां पूर्वसाक्षात्कारे प्रयुक्तान् केचन विशेषान् शब्दान् पुनरपि उक्तवान्। एतेन तस्य सन्देशस्य बीजिङ्गनगरस्य च निरन्तरं विद्यमानानां चिन्तानां सातत्यस्य सङ्केतः प्राप्तः।

सः ट्रम्पं बोधयितुं प्रयत्नं कृतवान् यत् चीन अमेरिका च युद्धे संलग्नौ भवितुं न आवश्यकम्। शी जिनपिङ्गः पुनरपि प्रतिपादितवान् यत् सहकारेण चिन्तायाः महत्त्वपूर्णेषु क्षेत्रेषु स्थैर्यं स्थापयितुं शक्यते।

व्हाइट हाउस इत्यत्र आयोजिते राजकीयभोजे अमेरिकादेशस्य राष्ट्रपतिः डोनाल्ड ट्रम्पः चीनीनेता शी जिनपिङ्गश्च परस्परं प्रशंसां कृतवन्तौ। एकदशवर्षेभ्यः अधिककालानन्तरं शी जिनपिङ्गस्य वाशिङ्गटनस्य एषा प्रथमा यात्रा अस्ति। शी जिनपिङ्गः शुक्रवासरे व्हाइट हाउस इत्यत्र चायपानकार्यक्रमे तथा नेशनल आर्काइव्स इत्यस्य भ्रमणे भागं गृहीत्वा स्वकीयां यात्रां समापयिष्यति।

ट्रम्पः अस्मिन् अवसरे चीन अमेरिका योर्मध्ये “व्यापारस्य परस्परसम्मानस्य च आधारस्य” प्रशंसां कृतवान्। सः अवदत्, “राष्ट्रपतिः शी अहं च उभावपि अवगच्छावः यत् वयं भिन्नव्यवस्थानां प्रतिनिधित्वं कुर्वः, किन्तु अस्माकं जनानां मध्ये सम्बन्धाः निरन्तरं विद्यन्ते।”

राजकीयभोजस्य समये मुख्योपवेशनस्थले ट्रम्पस्य शी जिनपिङ्गस्य च सह अमेरिकादेशस्य चतसृणां प्रमुखप्रौद्योगिकीसम्पदां अधिकारिणः उपविष्टाः दृश्यन्ते स्म। तेषु एनवीडिया संस्थायाः जेन्सेन हुआङ्गः, एएमडी संस्थायाः मुख्यकार्यकारिणी लिसा सू, टेस्ला संस्थायाः एलन मस्कः तथा एप्पल संस्थायाः पूर्वमुख्यकार्यकारी टिम कुकश्च अन्तर्भवन्ति।

राजकीयभोजस्य समये ट्रम्पः शी जिनपिङ्गाय बाल्ड ईगल इति अमेरिकादेशस्य एकस्य गरुडस्य प्रतिमां उपहाररूपेण प्रदत्तवान्। ट्रम्पः अवदत्, “बाल्ड ईगल इति अमेरिकादेशस्य राष्ट्रियं प्रतीकम् अस्ति तथा च एतत् अमेरिकादेशस्य स्वतन्त्रतायाः उच्चैः उड्डीयमानायाः भावनायाः प्रतीकम् अस्ति।”

---------------

Hindusthan Samachar / Divya Ranjan