बीकानेरम्, २८ सेप्टेम्बरमासः (हि.स.)। अमरसिंहराठौडस्य वीररसप्रधानायाः ‘रम्मत’-इत्यस्याः प्रस्तुत्यै प्रसिद्धस्य आचार्यचत्वरस्य ‘पाटा’-स्थलानि पुनरे-कवारं मञ्चरूपेण परिणतानि। प्रायः त्रिंशद्वर्षाणाम् अनन्तरम् अत्र कवितानां स्वरः पुनः गुञ्जितः। नगरस्य कविभिः स्वकीयाः रचनाः प्रस्तुताः, येन श्रोतारः मन्त्र्मुग्धाः अभवन्।

अवसरः आसीत् रोटरीक्लब-ऑफ-बीकानेर-रॉयल्स तथा प्रसार-संस्थयोः संयुक्तप्रयासेन प्रारब्धायाः ‘जनमनकाव्य-यात्रायाः’ प्रथमपड़ावस्य। मञ्चीयकाव्य-परम्परायाः पुनरुज्जीवनस्य उद्देश्येन प्रारब्धायाः यात्रायाः प्रथमः क्रम: दिवङ्गताय कवये गौरीशङ्कराचार्याय ‘अरुण’-इत्यस्मै समर्पितः आसीत्। कार्यक्रमस्य अध्यक्षता शिक्षानिदेशालयस्य सेवानिवृत्तेन संयुक्तनिदेशकेन डॉ. विजयशङ्कराचार्येण कृता।

कार्यक्रमे मनीषा-आर्यसोनी, इरशाद-अजीजः, सञ्जय-आचार्यवरुणः, मोनिका-गौडः, विप्लवव्यासः, आनन्दमस्तानः, बाबूलालछङ्गाणी तथा डॉ. हरिशङ्कर-आचार्यः सहभागितां कृतवन्तः। कविभिः हिन्दी, राजस्थानी, उर्दूभाषासु विभिन्न-रसपूर्णाः रचनाः प्रस्तुताः।

समारोहे रोटरीक्लब इत्यस्य डिस्ट्रिक्ट-गवर्नरः बृजमोहन-अग्रवालः, पूर्वगवर्नरः हरीशगौडः, जनपदमहासचिवः इन्द्रपाल-शर्मा, सहायकगवर्नरः आनन्द-आचार्यः, अध्यक्षः विपिनलढ्ढा, सचिवः जगदीपसिंह-ओबेरॉय, ऋषिधामू, डॉ. विजयशङ्कर-आचार्यः, विनयहर्षः, युवा उद्यमी अनुजमित्तलः, डॉ. चन्द्रशेखरश्रीमाली, गोपालजोशी, हरीशबी.शर्मा, डॉ. नमामि-शङ्कराचार्यः, योगेशराजस्थानी, कृष्ण-कान्तव्यासः इत्यादयः बहवः स्थानीय-नागरिकाः उपस्थिताः आसन्।

एकस्मिन् काले गौरीशङ्कराचार्यः ‘अरुणः’, अजीजआजादः तथा भवानी-शङ्करव्यासः ‘विनोदः’ इत्यादयः वरिष्ठ-कवयः आचार्यचत्वरे स्वकीयाः कविताः पठन्ति स्म। रविवासरे तेषाम् एव परम्परायाः अनुसरणं कुर्वन्तः ‘अरुण’-इत्यस्य पुत्रः सञ्जयवरुणः, अजीज-आजादस्य पुत्रः इरशाद-अजीजः तथा ‘विनोद’-इत्यस्य पौत्रः विप्लवव्यासः आचार्यचत्वरस्य पाटे सज्जिते मञ्चे प्रथमवारं कविताः अपठन्। रोटरीक्लब-ऑफ्-बीकानेर-रॉयल्स-संस्थायाः अध्यक्षः अभियन्ता विपिनलढ्ढा कृतज्ञतां प्रकटितवान् तथा अद्यतनस्य चलभाषीय-युगस्य मध्येऽपि कविताश्रवणाय बहूनां श्रोतॄणाम् आगमनस्य प्रशंसां कृतवान्। तेन उक्तं यत् एषः नवाचारः मञ्चीयकाव्य-परम्परां प्रोत्साहितुं महत्त्वपूर्णः सिद्धः भविष्यति।

‘जनमनकाव्ययात्रायाः’ द्वितीयः क्रम: २५ अक्टोबरमासे कीकाणीव्यासचत्वरस्य पाटेषु भविष्यति। प्रसार-संस्थायाः प्रदेशाध्यक्षः डॉ. हरिशङ्कराचार्यः अवदत् यत् एषः क्रम: राजस्थानीभाषायाः मूर्धन्यसाहित्यकाराय मुरलीधरव्यासाय ‘राजस्थानी’-इत्यस्मै समर्पितः भविष्यति। सः अवदत् यत् प्रत्येकस्मिन् कार्यक्रमे नूतनकविभ्यः अपि मञ्चे कवितापाठस्य अवसरः प्रदास्यते।

Hindusthan Samachar / Divya Ranjan