नोएडा, २९ सेप्टेम्बरमासः (हि.स.)। ग्रेटरनोएडानगरे आयोजितस्य उत्तरप्रदेश-अन्ताराष्ट्रिय-व्यापारप्रदर्शनस्य समापना-वसरे केन्द्रीयवस्त्रमन्त्री गिरिराजसिंहः अवदत् यत् उत्तरप्रदेशस्य परिचयः अधुना पुरातन ‘कट्टा-उद्योगेन’ न, अपितु ब्रह्मोसमिसाइल इत्यनेन युद्धविमानैः च सदृशैः आधुनिकैः रक्षोत्पादनैः भवति। सः अवदत् यत् विधिव्यवस्था, आधारभूत-संरचना, द्रुतमार्गाः, विमानसम्पर्कः औद्योगिक-विकासश्च इत्येतेषु क्षेत्रेषु अभवद्भिः परिवर्तनैः उत्तरप्रदेशाय नवीनः आर्थिकपरिचयः प्राप्तः अस्ति।

गिरिराजसिंहः समापनकार्यक्रमे अवदत् यत् भारतस्य युवाशक्तिः देशस्य महत्तमा शक्तिः अस्ति तथा उत्तरप्रदेशः अस्याः शक्तेः महत्त्वपूर्णं केन्द्रम् अस्ति। सः अवदत् यत् प्रदेशस्य औद्योगिकक्षमता अधुना पारम्परिकक्षेत्रेषु एव सीमिता नास्ति, अपितु रक्षोत्पादनस्य, आधुनिक-विनिर्माणस्य, निर्यातस्य प्रौद्योगिक्याः च क्षेत्रेष्वपि नवीनाः सम्भावनाः दृश्यन्ते। अधुना अत्र ब्रह्मोसमिसाइल इत्यस्य युद्धविमानानां च सदृशानां आधुनिक-रक्षोत्पादानां निर्माणस्य चर्चा भवति। एतत् परिवर्तनं प्रदेशे विकसितस्य औद्योगिकस्य रक्षाक्षेत्रस्य च क्षमतां प्रदर्शयति।

सः अवदत् यत् उत्तमविधिव्यवस्था, मार्गविमानसम्पर्कश्च तथा औद्योगिक-संरचनया निवेशाय व्यापाराय च नवीनाः अवसराः निर्मिताः सन्ति। जेवरस्थितस्य नोएडा-अन्ताराष्ट्रिय-विमानपत्तनस्य, द्रुतमार्गाणां तथा अन्यानाम् आधारभूत-संरचना-परि-योजनानां उल्लेखं कुर्वन् सः अवदत् यत् उत्तमसम्पर्क-व्यवस्थया प्रदेशस्य विभिन्नभागानां मध्ये आवागमनं व्यापारिकक्रियाकलापाश्च सुलभाः भवन्ति।

केन्द्रीयमन्त्रिणा एकजनपद-एकोत्पाद-योजनायाः उल्लेखं कुर्वता उक्तं यत् अस्याः योजनायाः माध्यमेन जनपदानां विशिष्टोत्पादान्, शिल्पिनः उद्यमिनश्च विपणिना सह संयोजयितुं प्रयासः कृतः अस्ति। वाराणस्याः साटिका, मुरादाबादस्य पीतलोत्पादाः, भदोहीनगरस्य कालीनाः, लखनऊनगरस्य चिकनकारी इत्यादीनां प्रदेशस्य विभिन्नोत्पादानां स्वकीया विशिष्टपरिचितिः अस्ति। एतेषाम् उत्पादानां आधुनिकप्रौद्योगिक्या, उत्तमपैकेजिङ्गेन, ब्राण्डनिर्माणेन वैश्विकविपणिना च सह संयोजनस्य आवश्यकता वर्तते।

गिरिराजसिंहः यूपीआईटीएस-मध्ये आयोजितानां बी२बी-सभानां व्यापारिक-क्रियाकलापानां च उल्लेखं कुर्वन् अवदत् यत् अनेन आयोजनेन उत्तरप्रदेशस्य उद्यमिनः, निर्यातकाः, शिल्पिनः, प्रदर्शकाः तथा देश-विदेशेभ्यः आगताः क्रेतारः एकस्मिन् मञ्चे आनेतुं कार्यं कृतम्। एतादृशानि आयोजनानि प्रदेशस्य उत्पादानां वैश्विकविपणिना सह संयोजने महत्त्वपूर्णां भूमिकां निर्वहन्ति। सः अवदत् यत् उत्तरप्रदेशस्य अर्थव्यवस्थां एक-खर्ब-अमेरिकीडॉलर-पर्यन्तं नेतुं लक्ष्यं निर्धारितम् अस्ति तथा निर्यातस्य, विनिर्माणस्य, सूक्ष्म-लघु-मध्यम-उद्यमक्षेत्रस्य च अस्मिन् महत्त्वपूर्णा भूमिका भवितुं शक्नोति।

केन्द्रीयमन्त्रिणा देशे प्रत्यक्षविदेशी-निवेशस्य निर्यातस्य च वृद्धेः उल्लेखं कुर्वता उक्तं यत् देशस्य वैश्विक-आर्थिकभूमिका वर्धमाना अस्ति। ऊर्जायातेषु निर्भरतां न्यूनीकर्तुं एथेनॉल् इत्यादीनां वैकल्पिक-इन्धनानां प्रोत्साहने सः बलं दत्तवान्। सः अवदत् यत् ऊर्जायातेषु व्ययमानं धनं न्यूनीकर्तुं स्वावलम्बनस्य दिशि महत्त्वपूर्णं सोपानम् अस्ति। भारतस्य वर्धमानानाम् ऊर्जा-आवश्यकतानां दृष्ट्या वैकल्पिकानां स्वदेशीयानां च ऊर्जास्रोतसां विस्तारः आवश्यकः अस्ति।

गिरिराजसिंहः ब्रिक्स् इत्यादिषु विभिन्नेषु अन्तर्राष्ट्रीयमञ्चेषु भारतस्य वर्धमानायाः भूमिकायाः उल्लेखं कृतवान्। सः अवदत् यत् भारतं वैश्विक-आर्थिक-कूटनीतिक-संवादे महत्त्वपूर्णां भूमिकां निर्वहति। सः अवदत् यत् उत्तरप्रदेशस्य आर्थिक-सुदृढतायाः प्रभावः देशस्य समग्रार्थ-व्यवस्थायामपि भविष्यति। प्रदेशे उद्योगानां, निर्यातस्य, सूक्ष्म-लघु-मध्यम-उद्यमानां स्थानीयोत्पादानां च प्रोत्साहनेन रोजगारस्य आर्थिकक्रियाकलापानां च विस्तारं कर्तुं शक्यते।

केन्द्रीयमन्त्रिणा यूपीआईटीएस्-२०२६ इत्यस्य आयोजनसम्बद्धानाम् अधि-कारिणां, विभिन्नविभागानाम्, इण्डिया एक्स्पो मार्ट्-संस्थायाः, उद्यमिनां, शिल्पिनां, प्रदर्शकाणां तथा देश-विदेशेभ्यः आगतानां क्रेतॄणां योगदानस्य प्रशंसा कृता। सः अवदत् यत् पञ्चदिवसीयेन आयोजनेन उत्तरप्रदेशस्य उत्पादानाम्, उद्यमशीलतायाः, हस्तशिल्पस्य औद्योगिक-क्षमतायाश्च वैश्विकमञ्चे प्रदर्शनस्य अवसरः प्राप्तः। सः आयोजनस्य व्यवस्थायाः प्रशंसां कुर्वन् यूपीआईटीएस-२०२६ इत्यस्य सफलतायै योगदानं दत्तवत्याः सम्पूर्णस्य दलस्य प्रति आभारं प्रकटितवान्। अस्मिन् अवसरे प्रदेशस्य मन्त्रिणः भूपेन्द्रचौधरी, सूर्यप्रतापशाही, नन्दगोपालगुप्तनन्दी इत्यादयः अन्ये च अतिथयः उपस्थिताः आसन्।

Hindusthan Samachar / Divya Ranjan