Enter your Email Address to subscribe to our newsletters
गोरखपुरम्, 29 सितंबरमासः (हि.स.)।
गोरखपुरस्य जङ्गलधूसडस्थे महाराणा प्रतापमहाविद्यालये युगपुरुषस्य ब्रह्मलीनस्य महन्तदिग्विजयनाथजीमहाराजस्य सप्तपञ्चाशत्तम्याः तथा राष्ट्रसन्तस्य ब्रह्मलीनस्य महन्तअवेद्यनाथजीमहाराजस्य द्वादश्याः पुण्यतिथेः उपलक्ष्ये श्रद्धाञ्जलिसमारोहः आयोजितः। कार्यक्रमे महन्तद्वयस्य व्यक्तित्वं कृतित्वं च स्मृत्वा तयोः आदर्शेभ्यः प्रेरणां स्वीकर्तुं आह्वानं कृतम्।
कार्यक्रमस्य मुख्यवक्ता दीनदयालोपाध्यायगोरखपुरविश्वविद्यालयस्य रक्षाव्यूहात्मकाध्ययनविभागस्य आचार्यः प्रो. हर्षकुमारसिन्हा छात्रान् सम्बोधयन् अवदत् यत् अस्माकं जीवनं केवलं कर्मणां परिणामः न, अपितु ईश्वरस्य अनुपमं वरदानम् अस्ति। अतः प्रातःकाले वयं स्वपूर्वजानाम् ईश्वरस्य च स्मरणं कुर्मः। सः अवदत् यत् मनुष्यजीवनं स्वयमेव अत्यन्तं रोचकं प्रेरणाप्रदं च विषयम् अस्ति। वयं विविधविषयाणाम् अध्ययनं कुर्मः, किन्तु स्वसहपाठिनां पूर्वजानां महापुरुषाणां च जीवनं पठितुं प्रयत्नः न्यूनः भवति। छात्रैः स्ववर्तमानस्थितेः मूल्याङ्कनं कृत्वा निर्धारितलक्ष्यस्य दिशि निरन्तरं प्रगतिः करणीया।
सः अवदत् यत् कस्यचित् महान् व्यक्तित्वस्य श्रद्धाञ्जलिसभा तदैव सार्थका भवति, यदा वयं तस्य महापुरुषस्य न्यूनातिन्यूनम् एकं गुणं स्वजीवने आत्मसात्कुर्मः। पितृपक्षे आयोजितेयम् श्रद्धाञ्जलिसभा गोरक्षपीठस्य पूज्यमहन्तद्वयस्य व्यक्तित्वात् कृतित्वाच्च प्रेरणां स्वीकृत्य जीवने अग्रे प्रवर्तितुं अवसरं प्रददाति।
महन्तदिग्विजयनाथजीमहाराजस्य योगदानं रेखाङ्कयन् प्रो. सिन्हा अवदत् यत् परतन्त्रे भारते यदा देशवासिनः स्वातन्त्र्यस्य राष्ट्रियस्वाभिमानस्य च कृते संघर्षं कुर्वन्ति स्म, तस्मिन् समये महन्तदिग्विजयनाथजीमहाराजः तादृश्याः शिक्षाव्यवस्थायाः आवश्यकतां अनुभूतवान् या भारतीयतां राष्ट्रभावनां च सुदृढां कर्तुं शक्नुयात्। सः दूरदर्शिन्या चिन्तनपद्धत्या युवकेषु शिक्षा, क्रीडा, स्वास्थ्यं राष्ट्रियचेतनां च प्रति संस्कारान् विकसितुं सङ्कल्पं कृतवान्। एतदुद्देश्येन वर्षे १९३२ तमे महाराणा प्रतापशिक्षापरिषदः स्थापना कृता।
महन्तअवेद्यनाथजीमहाराजस्य योगदानस्य उल्लेखं कुर्वन् सः अवदत् यत् सः स्वजीवनं दलितानां पीडितानाम् अनाथानां निराश्रितानां च उत्थानाय समर्पितवान्। महन्तदिग्विजयनाथजीमहाराजेन रोपितस्य महाराणा प्रतापशिक्षापरिषदः पौधस्य सः निरन्तरं पोषणं कृत्वा तस्य सेवापरम्परां अग्रे नीतवान्। सः अवदत् यत् अस्यामेव यशस्विन्यां परम्परायां वर्तमानः गोरक्षपीठाधीश्वरः उत्तरप्रदेशस्य मुख्यमन्त्री च योगी आदित्यनाथजीमहाराजः निरन्तरं प्रवर्तमानः अस्ति। तस्य व्यक्तित्वे दृश्यमााना विराटता सेवाभावना च गुरुपरम्परया प्राप्तसंस्काराणां परिणामः अस्ति।
चरित्रं अनुशासनं सेवां च जीवनस्य आधारं कुर्वन्तु युवानः : स्वामी अनिरुद्धानन्दगिरिः
अध्यक्षीयोद्बोधने स्वामी अनिरुद्धानन्दगिरिजीमहाराजः अवदत् यत् महापुरुषाणां पुण्यतिथिः केवलं स्मरणस्य अवसरः न, अपितु तेषाम् आदर्शान् स्वजीवने आचरितुं सङ्कल्पं स्वीकर्तुं अवसरः अस्ति। महन्तदिग्विजयनाथजीमहाराजेन राष्ट्रस्य समाजस्य च कृते शिक्षा संस्कारयोः या आधारशिला स्थापिता तथा महन्तअवेद्यनाथजीमहाराजेन सेवा समरसता वञ्चितानाम् उत्थानं च माध्यमीकृत्य या परम्परा अग्रे वर्धिता, सा अद्यापि समाजाय दिशां प्रददाति।
सः छात्रान् आह्वयत् यत् ते महापुरुषाणां जीवनात् प्रेरणां स्वीकृत्य चरित्रम्, अनुशासनम्, सेवा राष्ट्रभावना च स्वजीवनस्य अभिन्नम् अङ्गं कुर्वन्तु।
महाविद्यालयस्य प्राचार्यः डॉ. मनीषकुमारत्रिपाठी कार्यक्रमे उपस्थितानाम् अतिथीनां प्रति आभारं प्रकटितवान्। कार्यक्रमस्य सञ्चालनं बी.एससी. प्रथमसेमेस्टरस्य छात्रा सृष्टिविश्वकर्मा अकरोत्। अस्मिन् अवसरे महाविद्यालयस्य शिक्षकाः, कर्मचारिणः बहुसङ्ख्याकाः छात्राः च उपस्थिताः आसन्।
---------------
Hindusthan Samachar / Dheeraj Maithani